ဂါဇာစီးတီး၊ ဇန်နဝါရီ-၁၆-၂၀၂၅
မျိုးဆက်(VOM)
၁၅ လကြာဖြစ်ပွားနေတဲ့ ဂါဇာစစ်ပွဲအဆုံးသတ်ရေးအတွက် အစ္စရေးနဲ့ ဟားမတ်စ်တို့အကြား အပစ်ရပ်ရေးနဲ့ ဓါးစာခံလွတ်မြောက်ရေး သဘောတူညီချက် ရရှိခဲ့ကြောင်း အမေရိကန်နဲ့ ကာတာ စေ့စပ်ညှိနှိုင်းရေးမှူးတွေက ပြောပါတယ်။
ဒီသဘောတူညီချက်ကို အစ္စရေးအစိုးရက အတည်ပြုထားပြီး လာမယ့် တနင်္ဂနွေနေ့မှာ စတင်သက်ဝင်မယ်လို့ ကာတာဝန်ကြီးချုပ်က ပြောပါတယ်။ ဂါဇာမှာ တိုက်ပွဲတွေ အဆုံးသတ်ပြီးနောက် လူသားချင်းစာနာမှု အကူအညီတွေ တိုးမြှင့်ပေးကာ ဓါးစာခံတွေကိုလည်း သူတို့ရဲ့ မိသားစုတွေနဲ့ ပြန်လည်ပေါင်းနိုင်မယ်လို့ အမေရိကန်သမ္မတ ဂျိုးဘိုင်ဒင်က ပြောပါတယ်။
သဘောတူညီချက်ရဲ့ နောက်ဆုံးအသေးစိတ်အချက်အလက်တွေကို လုပ်ဆောင်နေဆဲဖြစ်ပေမယ့် သဘောတူညီချက်ရရှိမှုအတွက် ဂျိုးဘိုင်ဒင်ကို ကျေးဇူးတင်ကြောင်း အစ္စရေးဝန်ကြီးချုပ် နေတန်ယာဟုက ပြောပါတယ်။
အပစ်အခတ်ရပ်စဲရေး ပထမခြောက်ပတ်မစတင်မီ ဟားမတ်စ်တို့ဟာ အမျိုးသမီး၊ ကလေးငယ်နဲ့သက်ကြီးရွယ်အိုအပါအဝင် ဓါးစာခံ ၃၃ ယောက်ကို ပြန်လွှတ်ပေးပြီး အစ္စရေးကလည်း အကျဉ်းထောင်တွေမှာ ထိန်းသိန်းထားတဲ့ ပါလက်စတိုင်းတွေကို ပြန်လွှတ်ပေးရမှာဖြစ်တယ်လို့ ကာတာဝန်ကြီးချု့်က ပြောပါတယ်။
အစ္စရေးတပ်တွေဟာ လူနေထူထပ်တဲ့ ဒေသတွေကနေ ရုပ်သိမ်းရမှာဖြစ်ပြီး ဒုက္ခသည်တွေ နေရပ်ပြန်ရေး ခွင့်ပြုပေးရမှာဖြစ်ကာ ရာနဲ့ချီတဲ့ အကူအညီပေးရေးယာဉ်တွေကိုလည်း နေ့စဉ်ခွင့်ပြုရမှာဖြစ်ပါတယ်။
ကျန်ရှိနေတဲ့ ဓါးစာခံတွေပြန်လွှတ်ပေးမယ့် အပစ်ရပ် ဒုတိယအဆင့်အတွက် စေ့စပ်ညှိနှိုင်းမှုတွေကိုတော့ အစ္စရေးတပ်တွေ အပြည့်အ၀ ရုပ်သိမ်းရေးနဲ့ ရေရှည်တည်တံ့တဲ့ ငြိမ်းချမ်းရေးအတွက် ဆွေးနွေးသွားမှာဖြစ်ပြီး အပစ်ရပ် ၁၆ ရက်မြောက်မှာ စတင်မှာဖြစ်ပါတယ်။
တတိယအဆင့်နဲ့ နောက်ဆုံးအဆင့်တွေမှာတော့ ဂါဇာကမ်းမြှောင်ဒေသ ပြန်လည်တည်ဆောက်ရေးနဲ့ ကျန်ရှိနေတဲ့ ဓါးစာခံအလောင်းတွေ ပြန်လည်ရရှိရေးတို့ ပါဝင်ပါတယ်။ ဒုတိယအဆင့်နဲ့ တတိယအဆင့်ကို ဆွေးနွေးဖို့ ရှင်းလင်းတဲ့ ယန္တရားတခုရှိတယ်လို့ ကာတာဝန်ကြီးချုပ်က ပြောပါတယ်။
ဟားမတ်စ်ခေါင်းဆောင်ကတော့ ဒါဟာ ပါလက်စတိုင်းတွေရဲ့ ခံနိုင်ရည်ရှိမှုကြောင့်လို့ ပြောပါတယ်။ အစ္စရေးနဲ့ ပါလက်စတိုင်းပြည်သူတွေ့ ဒီသတင်းကို ကြိုဆိုနေကြပေမယ့် မြေပြင်မှာတော့ တိုက်ပွဲတွေက ပြင်းထန်ဆဲဖြစ်ပါတယ်။
ဒီအတောအတွင်း အစ္စရေးရဲ့ လေကြောင်းတိုက်ခိုက်မှုကြောင့် ဂါဇာစီးတီးရှိ ရှိတ်ရက်ဝမ်အရပ်မှာ ၁၂ ယောက်အပါအဝင် လူ ၂၀ ကျော်သေဆုံးခဲ့တယ်လို့ ဂါဇာကျန်းမာရေးအာဏာပိုင်တွေ့ ဆိုပါတယ်။လက်ရှိချိန်ထိ ဂါဇာမှာ အရပ်သား ၄၆၇၀၀ သေဆုံးခဲ့ပြီဖြစ်ပါတယ်။
Ref:BBC
Photo:Reuters/Getty Images
